“Azərbaycanda iqtisadi islahatlar: vətəndaş cəmiyyətinin rolu” mövzusunda müzakirə keçirilib

  • A
  • A+
  • A-
  •  Azərbaycan Respublikası İqtisadi İslahatların Təhlili və Kommunikasiya Mərkəzi, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası ilə birlikdə “Azərbaycanda iqtisadi islahatlar: vətəndaş cəmiyyətinin rolu” mövzusunda dəyirmi masa keçirib. Şura Katibliyinin icraçı direktoru Fərasət Qurbanov görüşü açaraq  bildirib ki, “Milli iqtisadiyyat və iqtisadiyyatın əsas sektorları üzrə strateji yol xəritəsi” ilə əlaqədar hazırlanmış sənədlər toplusu 2016-cı il  27 iyulda QHT-lərin iştirakı ilə geniş müzakirə edilib. Şura tərəfindən həmin sənədlər toplusunun öyrənilməsi və təkliflərin verilməsi ilə bağlı Ekspertlər Qrupu yaradılıb. Qrup məhsuldar işləyərək iqtisadiyyatın müxtəlif sahələri üzrə təkliflər hazırlayaraq İİTKM-ə təqdim edib. F.Qurbanov qeyd edib ki, bu təkliflərin xeyli hissəsi “Milli iqtisadiyyat və iqtisadiyyatın əsas sektorları üzrə strateji yol xəritəsi”nin hazırlanmasında nəzərə alınıb.

                Fərasət Qurbanov deyib ki, bu gün artıq Yol Xəritəsində nəzərdə tutulan islahatların real həyatda tətbiqi uğurla həyata keçirilir. QHT-lərin sözügedən sənəddə əksini tapan məsələlərin həyata keçirilməsində yaxından iştirakı vacibdir. QHT-lərin burada rolu ictimai nəzarətin təşkil edilməsində, müxtəlif istiqamətlər üzrə ekspert xidmətlərinin göstərilməsində faydalı ola bilər.

    Azərbaycan Respublikası İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı “Azərbaycan Respublikasında yeni iqtisadi model quruculuğu” mövzusunda giriş nitqi ilə çıxış edib. O deyib ki, Azərbaycanda islahatların ən böyük uğuru onun dönməz xarakter almasındadır. Çünki təkcə dövlət qurumları deyil, cəmiyyətin bütün təbəqələri islahat prosesinin bütün həlqələrinə - hazırlanma, icra, monitorinq və kommunikasiyaya yaxından cəlb olunublar. Hazırda neftin qiyməti hətta büdcə proqnozunda nəzərdə tutulduğundan 50 faizdən də çox baha olmasına baxmayaraq, iqtisadi islahatlar kursu dönməz, davamlı və sistemli xarakter daşıyır. Aşağı neft qiymətlərinə immunitet qazanmış milli iqtisadiyyat islahatların hesabına qeyri-neft sektoru üzrə ixrac həcmini 1/4-ə qədər artırıb, qlobal rəqabətlilik və "Doing business" reytinqlərində çətin rəqiblər geridə buraxılır. Vüsal Qasımlı əlavə edib ki, islahatlar nöqtəvi olmaqla əsas çağırışları hədəf alır. “İslahatlar iqtisadiyyatın drayverinə çevrilib. 2018-ci ildə iqtisadi artımın bərpası yeni iqtisadi tsiklin başlanğıcı deməkdir. İndi əsas məsələ iqtisadi artım tempinin yüksək həddinə nail olmaq və davamlılığı təmin etməkdən ibarətdir. Bunun üçün rəqabət mühitinin daha da yaxşılaşdırılması, institutsional və struktur islahatlarının davam etdirilməsi, təşviq mexanizminin gücləndirilməsi və maliyyə-bank sektorunda böhrandan çıxmaq üçün əldə olunmuş ilkin nəticələri möhkəmləndirmək lazımdır. İqtisadi islahatların ölkədə reallaşdırılan infrastruktur layihələri ilə sinerji təşkil etməsi dayanıqlı inkişaf üçün şərtdir.”

    Görüş çərçivəsində İqtisadi və Siyasi Araşdırmalar Mərkəzinin prezidenti Sabit Bağırov “İqtisadi islahatlarda vətəndaş cəmiyyətinin rolu”, İqtisadi Resursların Öyrənilməsi İctimai Birliyinin sədri Ruslan Atakişiyev “İqtisadi islahatlar: makroiqtisadi sabitlik və dayanıqlı inkişaf”, İqtisadi və Sosial İnkişaf Mərkəzi İctimai Birliyinin sədri Vüqar Bayramov “İqtisadi islahatlar: fiskal dayanıqlıq”, İqtisadi Təşəbbüslərə Yardım İctimai Birliyinin rəhbəri Azər Mehdiyev “İqtisadi islahatlar: biznes mühitinin təkmilləşdirilməsi” mövzularında məruzə ilə çıxışlar ediblər.

    Çıxışlar yekunlaşdıqdan vətəndaş cəmiyyəti institutlarının nümayəndələrini maraqlandıran suallar cavablandırılıb. Tədbir iştirakçıları aparılan islahatlar prosesinin davamlılığı ilə maraqlanıblar. Bildirilib ki, Prezident İlham Əliyevin apardığı siyasətə uyğun olaraq islahat prosesi davamlı xarakter daşıyır. Nəticədə yaranan inkişaf və dinamika özünü qeyri neft ixracında aydın şəkildə büruzə verir. Ölkəmizdə həyata keçirilən iqtisadi islahatlar nəticəsində 2017-ci ilin 10 ayı ərzində qeyri-neft sektoru üzrə ixracda ciddi artım baş verib. Eyni zamanda mövsümü amillərdən dolayı payızda ixracın strukturunda da dəyişiklik olub.

    Müzakirələrdə vurğulanıb ki, vətəndaş cəmiyyəti institutlarının islahat prosesində yaxından iştirak etməsi üçün imkanlar yaradılıb. Strateji yol xəritələrinin monitorinq və qiymətləndirmə nəticələrinin açıq ictimai müzakirələrinin təşkil olunması islahat prosesində vətəndaş iştirakçılığının təmin edilməsi və açıq hökümət prinsiplərinə uyğundur. Vətəndaş cəmiyyəti institutlarının İqtisadi İslahatların Təhlili və Kommunikasiya Mərkəzi ilə birlikdə islahatlar barədə maarifləndirmənin artırılması istiqamətində fəaliyyət göstərməsi üçün geniş imkanlar var.

    Sonda qeyd olunub ki, “Azərbaycanda iqtisadi islahatlar: vətəndaş cəmiyyətinin rolu” mövzusunda aparılan müzakirə islahat prosesinə öz töhfəsini verəcək.

     


    İİTKM-in departament rəhbəri Ramil Hüseynin ARB TV-yə müsahibəsi

    İİTKM-in departament rəhbəri Ramil Hüseyn

    IITKM-in departament rəhbəri Ramil Hüseynin XƏZƏR TV-yə müsahibəsi

    İİTKM-in departament rəhbəri Ramil Hüseyn

    Video arxiv